ආචාර්යතුමා

   දේවතා එළි මිථ්‍යාවක් ද? යතාර්ථයක් ද ?

 "දේවතාඑළි" යන වචනය ම අප ලාංකීය ජන සමාජයට අමුත්තක් නොවේ.එහෙත් කනින් අසා තිබුන ද ඒවා සජීවී ව හෝ කිසියම් ඡායාරූපයක සටහන් ව තිබෙනු දැක ඇත්තෝ විරලය.එසේ කිසියම් ඡායාරූපයක් වේ නම් එය ද බොහෝ විට කිසියම් සංස්කරණයකී.මම ද ඔබ මෙන් ම දේවතාඑළි පිළිබඳව අසා ඇත්තෙමී.එසේ ම සත්‍ය වේවා අසත්‍ය වේවා ඇතැම් ඡායාරූප දැක ඇත්තෙමී.

          එහෙත් මා මෙම ලිපිය ලිවීමට හේතු වූයේ එකී දේවතා එළි මගේ ම ජංගම දුරකථනයෙහි හටහන් වීම නිසා මා සිත තුළ වූ කිසියම් හැගීමක් ඔබ සමග බෙදාහදා ගන්නටය.
           ඇසට පෙනෙන ලෝකය තුළ ම නොපෙනෙන සියුම් ලොවක් ඇති බව තරමක් දුරට විද්‍යාත්මක ව අනාවරණය වී තිබුන ද එය සර්වප්‍රකාරයෙන් ම සාක්ෂාත් කර ගැනීමට මිනිසා විසින් දියුණු කරන ලද විද්‍යාව තවමත් පොහොසත් වී නැත.

          මම දිනක් මිනුවන්ගොඩ ප්‍රදේශයේ තිබෙන සුප්‍රසිද්ධ ගලී දේවාලය හෙවත් ගම්භාර දේවාලය වෙත ගියෙමී.එහි දී සිදු කරනු ලැබූ වන්දනාමාන කටයුතුවලින් අනතුරු ව ගම්භාර දෙවියන් හෙවත් සූනියම් දේවතාවුන්වහන්සේ වඩිනු ලබනවා යැයි විශ්වාස කරන වෘක්ෂය දෙසට ගියෙමී.
          ඒ මොහොතේ වන්දනා කටයුතුවලින් අනතුරු ව එතැනට රැස් වූ සමහර දෙනාගේ   මුවින්, 

" අර පේන්නේ ! අර !අර !අර! "
" මේ බලන්න. කොළ පාටයි, රතු පාටයි. "
" අර අතන දි ඒක තව ලොකු වෙලා පේනවා.තව එහාට කරන්න ඕක.අර පැත්තෙත්   පේනවද දන්නෙ නැ."
" ඔව් ම යි දෙයියනේ පේනවා නේන්නම් එක ළඟ හතරක් පහක් ම.සාදු! සාදු ! බල මහිමෙ, දෙවියන්ගෙ බල මහිමෙ.හාස්කම් තියෙනවැයි කියන්න තවත් උදාහරණ ඕන් නෑනී."
" මෙව්වා දකින්නත් පිං තියෙන්න ඕනෑ."
            මෙම කතාබහ මාගේ ද කුතුහලය අවුලුවාලන්නට විය.මම එම පිරිස දෙසට කිට්ටු කළෙමී.මාහට දකින්නට ලැබුනේ ඔවුන් තම අතැති ස්මාර්ට්ෆෝන්වල කැමරා ආධාරයෙන් වටපිටාවේ තිබෙන පියවි ඇසට නොපෙනෙන දේවතා එළි නරඹන ආකාරයයි.
           විස්මයෙන් යුතුව මම ද එය නරඹන්නට විය.සැබවින් ම ඒවා දේවතා එළියැ යි මම ද සිතමී.මන් ද තැනින් තැන එවැනි ආලෝක ලප රාශියක් දක්නට ලැබිණී.ඒවා එකිනෙක සැබෑ වෙනසකින් යුතු වූවාය.අනෙක් අතට ඒවා සෑම තැනක ම නොවීය.
ඇතැම් තැනෙක එක පෙළට ද තවත් තැනෙක යුගළයක් වශයෙන් ද ඒවා පෙනෙන්නට විය.එසේ ම ඒවා එකිනෙකට විවිධ වර්ණයන්ගෙන් ද  ‍යුක්ත වූවාය.
           මගේ අත ද වහා ම ක්‍රියාත්මක විය.සැනෙකින් මගේ ජංගම දුරකතන කැමරාවේ ඡායාරූප කිහිපයක් සනිටුහන් කර ගතිමී.ඒවායින් කිහිපයක් ඔබේ අවධානය සඳහා යොමු කරමී.

       තවදුරටත් මේ පිළිබඳ ව මම, කැලණිය විශ්වවිද්‍යාලයේ කැමරාකරණය, ඡායාරූප පිළිබඳ ව ලංකාවේ එක ම ආචාර්ය උපාධිධාරියා වූ උදිත ගයාෂාන් ගුණසේකර මහතාගෙන් විමසූවෙමී.

      එතුමා විසින් මෙම ඡායරූප විමසා බැලීමෙන් අනතුරු ව ඒ පිළිබඳ ව වැඩිදුරටත් ප්‍රත්‍යක්ෂ කරගැනීම සඳහා DSLR ( digital single-lens reflex )  කැමරාවකින් නැවත වතාවක් ඡායාරූප ලබාගෙන පරීක්ෂා කර බලන ලෙස උපදෙස් දුන්නේය.එහි දී ද මෙකී ලක්ෂණ තිබේ නම් එහි අර්ථය යමක් තිබෙන බව යැයි ඔහුගේ අදහස විය.එහෙත් ඔහු කිසිවිටෙකත් එයට දේවතාඑළි යැයි කීවේ ද නැත.එසේ ම එවැන්නක් ඇතැයි කීම හෝ නැතැයි කියා තර්ක කිරීම හෝ නොකරන්නට වගබලාගත්තේය.

         එහෙත් එවැනි කැමරාවකින් ඡායාරූපයක් ලබාගැනීමට හෝ මේ පිළිබඳව නැවත විමසා බැලීමට තරම් නිදහස් වේලාවක් තවමත් මාහට ලැබුනේ නැත.
මේ පිළිබඳව ඔබ සතු අත්දැකීම් හෝ ඡායාරූප තිබේ නම්, ඒ පිළිබඳව මා සමඟ බෙදාහදා ගන්නා මෙන් ඉල්ලාසිටිමී.

ආචාර්යතුමා.